السلام عليكــم ورحمـة الله وبركاتــه
.._.._..._..._..._..._...
ازيكوا يا شباب عاملين ايه ؟
يارب تكونوا بخير كده وحلوين
ندخل ف الموضووووع
البلكونة
معتقدش ان فى بيت ف مصر مفهوش بلكونة , يعنى نادراً لو حصلت
انا عن نفسى البلكونة ف حياتي بتمثلى أهمية كبيرة ... ليه بقى ؟!
لا والله مش علشان ابن الجيران ولا حاجة:D
بس لأنى بتقابل فيها مع واحدة من اقرب الناس ليا على وجه الأرض
وصديقتى الوحيدة ف مدينتى واختى وحاجات كتير كده
اسمها اسماء
صحيح انا للأسف مبشوفش اسماء كل يوم لأنى مش على طول ف الشقة اللى فوق
ولأنها كتير بتطنشنى
لكن لازم كل يومين ولا حاجة نطلع نرغى ف البلكونة
وده لان الفرق بينى وبين بلكونة اسماء متر واحد تقريباً
يعنى الحيطه الفاصلة مشتركة بينا
ساعات يكون معاها حاجة حلوة تدينى , عاملين صنف جديد تدوقنى , كتاب حلو ارميهولها
لب , سودانى , وممكن مية لو مكسله تدخل تشرب وهكذا انا برضه
و طبعاً اكاد أجزم ( حلوة اكاد اجزم دى )
اننا بنشكل مصدر ازعاج لا بأس بيه على الجيران
اللى منهم قرايب أسماء اللى قدامنا
على طول يقوم ابن خالتها ومراته طالعين
- ازيكوا يا بنات ؟ ما تتفضلوا تشربوا شاى عندنا
- على فكرة انتوا ممكن بدل الواقفة دى تعملوا بينكوا وبين بعض ترابيزة
وتاكلوا وتشربوا سوا بدل الواقفة دى
طبعاً انا وأسماء منردش ونفضل نضحك
لا وميحلالناش الكلام الا بعد منتصف الليل او متأخر يعنى من 11 وانتوا طالعين
ويا سلام لو موضوع ضحك يا سلااااااام
نفضل كاتمين صوت الضحك بالعافية (عيب الناس نايمين بنات مؤدبين ميضحكوش ف الشارع )
و ساعات نعيط لبعض مفيش مانع من النكد يعنى
حبيبتى اسماء دى والله
برضه لسه مدخلناش اوى ف صلب الموضوع
انا واسماء من زمان عايزين نتكلم عن الموضوع ده وازاى انه مهم جداً ف حياتنا
امبارح بقى بعد ما كلمت البت سومة لحد الساعة يجى 1.30 كده
جتلى كده فوكيرة عن النظرية البلكونية
وتتلخص هذه النظرية فى
ان البلكونة دى ف حد ذاتها ممكن تشكل شخصية البنى ادامين
طبعاً فى ناس عايشة حياتها ف البلكونة وخاصة لو واسعة و شرحة وبرحة
فى اللى بيحب الهدوء وفى اللى بيحبها علشان بنت الجيران
وفى اللى بيحب الوحدة وفى اللى بيحب الشموسة بالنهار والقمر بالليل
فانا قولت يعنى مثلا لو البلكونة كبيره وف مكان هادى
ممكن الشخص اللى ف البيت ده يطلع شخصية هادية مفكرة تميل إلى الهدوء والتأمل
لو البيت ف مكان شعبى شوية هتلاقى شخصية اجتماعية
لو ف مكان فى بنات واولاد من سن متقاربه تلاقى ابن الجيران وبنت الجيران وتظهر الشخصية الرومانسية
لو ف شارع ضيق والبيوت قريبة من بعض ممكن يتجنب ده خالص فيبقى شخصية انطوائية
او ممكن برضه اجتماعية بحكم قرب البيوت من بعضها
وهكذا يعنى
ايه رأيكوا مش نظرية برضه
وبكده اكون اول من وصل للنظرية البلكونية العبقرية البحتة
وخلى بالكوا انا مسجلااها كبراءة اختراع :D
ويلا فوتكوا بعافية
.jpg)